(Agora Sentral) Dili – Parlamentu Nasional liuhosi Bankada FRETELIN Lamenta ho Vice Ministru Saúde ba Fortalesimentu Institusional Saúde (VMFIS) oferese bolsu estudu ba nia oan rasik.
“Loron hira liuba, ami hakfodak ho notísia ne’ebé fó sai iha media hateten katak Vice Ministru Saúde ba Fortalesimentu Institusional Saúde (VMFIS) Jose dos Reis Magno fó bolsu estudu ba nia oan feto ne’ebé sai hanesan funsionáriu iha ninia gabinete rasik.”Dehan deputadu Deklarante Jose da Crus iha sala plenaria(6/10/2025)
Nia haktuir, Bankada Fretilin lamenta ministru ida ofisiál estadu nian ho pozisaun ne’ebé aas fó bolsa estudu ba nia oan rasik.
Tuir loloos bolsa estudu hanesan mandatu hosi konstituisaun no iha espíritu justisa sosiál nian, la’os priviléjiu , maibé sai hanesan instrumentu ida atu apoia ba sira ne’ebé merese no presiza duni bolsa refere.
Bolsa estudu tenke sai hanesan ponte ida ba aileba no agrikultór nia oan iha área remota sira, ba traballadór nia oan, ba kondutór sira nia oan ne’ebé mehi atu estuda iha universidade no espesialmente ba povu kbiit laek sira nia oan ne’ebé tuir loloos merese atu hetan priviléjiu ba bolsa estudu la’os ministru ida nia oan.
“pergunta mak ne’e, tanba saida mak ministru ida nia oan ne’ebé moris iha buat hotu kompletu tenke hetan bolsa estudu? ne’e la’os traisaun no insultu boot ba povu kbiit laek sira-nia oan?.”Duvida
“Bainhira ofisiál estadu ida esplora nia pozisaun hodi fó benefísiu ba nia família, maski ki’ik oinsá, ita asiste hela fini nepotizmu nian ne’ebé buras nonook de’it iha ita-nia rai. Ohin ne’e bolsu estudu, aban bele sai projetu, loron tuirmai bele sai pozisaun. No ita hatene katak istória nasaun ida-ne’e nian nakonu ho istória sira hanesan ida-ne’e.”tenik nia.
Tanba ne’e, Bankada Fretilin nafatin enkoraja no dezafia ba instituissaun relevante hanesan CAC nia responsabilidade no seriedade atu kombate korupsaun iha ita-nia rai.
Tanba ne’e, bankada Fretilin konvida no apela ba povu Timor laran tomak no parte hotu-hotu, inklui lejizlasaun, sosiedade sivíl no média, atu kontinua monitoriza no kritika Ministériu Saúde no governu atuál nia dezempeñu servisu ba atendimentu públika nian.
“Saude nu’udar direitu báziku ba sidadaun hotu-hotu iha rai ida-ne’e, no ita iha direitu atu simu ka hetan servisu saúde ne’ebé adekuadu no ho kualidade. Ita tenke hamutuk ezije mudansa reál ba ita-nia nasaun hodi hadi’a sistema saúde no moris-di’ak povu nian.”hakotu nia.
Jornalista : Ekipa Agora Sentral