Dili – Projetu Lei no 11/VI (3a) iha artigu 7 mak hanesan Artigo 1.° Objeto, Artigo 2.° Âmbito de Aplicação, Artigo 3.° Revogação retroactiva, Artigo 4.° Revogação de leis específicas, Artigo 5.° Restituições e efeitos financeiros e materiais, Artigo 6.° Regulamentação, no Artigo 7.° Disposição final e entrada em vigor.
Artigo hirak ne’e aprovadu iha diskusaun espesialidade ho votu unanimidade a Favor 62, Kontra 0, no Abstensaun 0.
Aleinde ne’e iha Finál Global Parlamentu Nasionál konsege aprova Projeitu Lei ne’e ho rezultadu unanimidade 62 a favor, 0 kontra, no 0 abstensaun.
Pontu Importante Lei Revogasaun:
- Objetivu Lei: Hamoos totál dispozisaun legál hotu ne’ebé fó pensaun mensál vitalísia ba Deputadu no Ex-Titular Órgaun Soberania, inklui hamoos benefísiu espesiál sira seluk
- Efeitu Retrospektivu: Lei ne’e sei hahú produz efeitu retroativu hahú hosi loron 20 Maiu 2002 (data ne’ebé hahú lejizlatura dahuluk).
- Ámbitu Aplikasaun: Aplika ba Deputadu atual no antigu hotu, no mós es-titulár órgaun soberania hanesan Prezidente Repúblika, Primeiru Ministru, membru Governu, no Prezidente Tribunál Superiór sira.
- Restituisaun Regalia:
- Valór pensaun vitalísia ne’ebé simu ona to’o lei ne’e tama iha vigór la presiza halo fali restituisaun.
- Maibé, “regalias no benefísiu materiál” sira seluk, hanesan uma ofisiál, veíkulu serbísu, motorista, eskolta, no kombustível, ne’ebé foin simu tenke entrega tomak fali ba Estadu no kontratu sira ne’ebé iha tenke hapara kedas.
- Regulamentasaun: Governu tenke aprova norma regulamentár sira ne’ebé presiza hodi ezekuta lei ne’e ho kompletu iha prazu másimu loron 30 hafoin lei ne’e publika.
Antes atu hahú diskusaun ba lejizlasaun ne’e, Prezidente Meza mós anunsia pedidu substituisaun tempurária ba deputadu sira husi bankada KUNTU no CNRT, hodi garante kvoru iha plenária.
Ho aprovasaun unanimidade hosi artigu hirak ne’e no votasaun finál globál ne’e, Parlamentu Nasionál finaliza ona matéria ne’e no haruka ba Komisaun Redasaun Finál atu finaliza antes publika.
Fontes : VMAP